Saqqummersitaq pillugu naatsumik nassuiaat
Maanna Naatsorsueqqissaartarfik pinerluttuliornermut tunngasunik kisitsisinik suliaqaqqittalerpoq. Massakkut saqqummerpoq pinerluttuliorneq 2011-mit 2014-mut qanoq allanngorarsimanersoq takutillugu taavalu Kisitsisaasivimmi kisitsisit 2006-imiit 2015-imut pillugu nammineq aaneqarsinnaalerlutik.
2015-imi Naatsorsueqqissaartarfik nalunaarsuutinik toqqartukkanik politiit sulianut isumaginninnermi ataqatigiissumik aaqqissuussivianneersunik pinerluttuliortarnermut kisitsisitigut paasissutissiinerup aallarteqqinnissaanut tigusaqarpoq. Pinerluttuliortarnermut kisitsisitigut paasissutissiisarneq ukiuni tulleriiaani nalunaarsuutit pitsaassusaannik qularinninneq peqqutigalugu unitsinneqarallarsimavoq. Nalunaarsuutilli pitsaassusaat nutaamik elektroniskiusumik nalunaarsuisalernermi pitsanngoriarsimapput. Naatsorsueqqissaartarfiup siornatigut pinerluttuliortarnermut kisitsisitigut paasissutissiisarnera politiit aalajangiinermut nalunaarsuutaannik tunngaveqarsimasut kukkunernillu arlalinnik kinguneqartarsimasut massakkut millilerneqarput.
Ukiuni tulleriiaani Naatsorsueqqissaartarfiup pinerluttuliortarnermut saqqummersittagaa aalajangiinernik kisimi imaqarsimavoq, massakkulli unnerluutiginninnernik aammalu pasineqarnernik kisitsisitigut paasissutissat suliarineqarsinnaalersimapput.
Pinerluttuliortarnermut kisitsisitigut paasissutissiineq kalaallit pinerluttulerinermi inatsisaannik unioqqutitsinernik, immikkut inatsisinik unioqqutitsinernik aammalu angallannermut inatsimmik unioqqutitsinernik tunngaveqarpoq.
Pinerluttuliortarnermilu kisitsisitigut paasissutissani sammisat unioqqutitsinermi unnerluussinermit pasineqarnernut aammalu aalajangiinernut suliat ingerlaarnerannut ersersitsisunik immikkoortitersimapput.
Pinerluttuliortarnermi kisitsisitigut paasissutissani unnerluussinerit aammalu pasineqarnerit amerlassusaat naatsorsorneqarput. Unnerluussineq ataaseq tassaavoq pinerluuteqarneq ataaseq (inatsimmik unioqqutitsineq ataaseq), inuillu arlaliusinnaapput (unioqqutitsisullu ilaannai imaluunniit tamakkerlutik aalajangiiffigineqarsinnaallutik). Paasisaqarnerorusukkuit periaatsip immikkoortua takuuk.
Saqqummersitami sammisat suliarineqartut tassaapput:
· Unnerluussinernut kisitsisitigut paasissutissat
o Pasineqarnernut kisitsisitigut paasissutissat
· Aalajangiinernut kisitsisitigut paasissutissat
· Aalajangiiffigineqarsimasut
o Inuusuttut pinerlunniartarnerat
o Utoqqaassuseq suiaassuserlu
· Periaaseq
· Nalunaarsuineq/takussutissat
· Immikkoortiterineq
Saqqummersitaq immikkut saqqummersitaavoq 2011-mit 2015-imut pinerluttuliortarnermi kisitsisitigut paasissutissanik imaqartoq. Ataatsikkoortumik Kisitsisaataasivimmi 2006-imit 2015-imut nalunaarsuutit nutaanik ilaartorneqarput. Siunissamilu pinerluttuliortarnermi kisitsisitigut paasissutissat ukiup siuliani nalunaarsuutinik tunngaveqartassapput ukiullu tulliani aasannginnerani saqqummertassallutik.
Politiit saqqummersitaanit oqaaseqaat
2010: ”Akuerineqarani atuinerit amerlassusiisa ikileriarnerannut 2010-mi politiit suliassaqarfimmi immikkut nakkutiginninnerannik kinguneqarpoq. Qaffariaatip annertunerpaartaa angallannermut inatsimmiippoq, qularnanngitsumik Kalaallit Nunaanni Politiit 2010-mi suliassaqarfimmi pingaartumik nakkutiginninnerannik pissuteqartumik – nakkutiginninneq malunnartumik aamma 2011-mi nanginneqarpoq. Aalisarnermut inatsimmik unioqqutitsinerit aamma amerleriarput. Tamanna ilaatigut politiit suleqatigisaasa annerpaat marluk – Issittumi Sakkutooqarfik aammalu Kalaallit Nunaanni Namminersorlutik Oqartussat – suliassaqarfimmi annerusumik suliniuteqarneranik kinguneqarpoq”. – Ukiumoortumik nalunaarusiaq 2010.
2014: “Inatsisini allani unioqqutitsinermi unnerluussinerit amerlassusaat amerleriarput. Tassungalu atatillugu unioqqutitsinerit amerleriarsimanerannik qularnaatsumik isummiussisoqarsinnaanngilaq. Tassani “immikkut inatsisini pinerlunniartarnermik” taaneqartumi oqartussat innuttaasunit unnerluussinernik amerlasuunik tigusaqartannginnerat, kisiannili killormut oqartussani sulisut nammineerlutik inatsisinik unioqqutitsinernik paasisaqartarnerat annertuumik ilisimaneqarmat. Amerleriaat iliuusissamik pilersaarummi allanngortoqarneranik imaluunniit tassunga atatillugu oqartussat allatut nakkutiginninnerannik, assersuutigalugu nakkutiginninnerup salliutinneqarneranik pissuteqarsinnaavoq.” – Ukiumoortumik nalunaarusiaq 2014.